බීමතින් රිය පැදවීමේ චෝදනාව සම්බන්ධයෙන් ඔස්ට්රේලියානු හිටපු සුපිරි ක්රිකට් ක්රීඩක ඩේවිඩ් වෝනර් අධිකරණය හමුවේ වරද පිළිගෙන තිබෙනවා.
පසුගිය අප්රේල් මාසයේදී ඔස්ට්රේලියාවේ මරූබ්රා ප්රදේශයේ සිදුකළ හදිසි රථවාහන සෝදිසි කිරීමකදී පොලිසිය විසින් ඔහුව අත්අඩංගුවට ගත්තේ බීමතින් රිය ධාවනය කිරීමේ චෝදනාව මතයි.
ඊට අදාළ නඩුව එරට වේවර්ලි ප්රාදේශීය අධිකරණය හමුවේ කැඳවූ අවස්ථාවේදී, වෝනර් වෙනුවෙන් පෙනී සිටි නීතිඥවරයා දැනුම් දුන්නේ තම සේවාදායකයා අදාළ චෝදනාවට වරද පිළිගන්නා බවයි.
කෙසේවෙතත් නඩු විභාගය සඳහා ඩේවිඩ් වෝනර් අධිකරණය හමුවේ පෙනී නොසිටි අතර, ඔහුට අදාළ දඬුවම් නියම කිරීම එළඹෙන අගෝස්තු 18 වැනිදාට කල් තබා ඇති බවයි වාර්තා කරන්නේ.
මෙම සිදුවීමත් සමග, ඉදිරියේදී පැවැත්වීමට නියමිත බිග් බෑෂ් ලීග් (BBL) තරගාවලියේදී සිඩ්නි තන්ඩර්ස් (Sydney Thunder) කණ්ඩායමේ නායකත්වය වෝනර්ට අහිමි වීමේ අවදානමක් මතුව ඇති බවද වාර්තා වෙනවා.
