ஆறு மாவட்டங்களில் 28,000 குடும்பங்கள் குடிநீர் பற்றாக்குறையை எதிர்கொள்கின்றன

By ITN News Editor ஆகஸ்ட் 8, 2023 11:22

ஆறு மாவட்டங்களில் 28,000 க்கும் மேற்பட்ட குடும்பங்கள் தற்போது பாதுகாப்பான குடிநீரைப் பெறுவதில் சிரமங்களை எதிர்கொண்டுள்ளதாக அனர்த்த முகாமைத்துவ நிலையம் தெரிவித்துள்ளது.

நாட்டில் நிலவும் வரட்சியினால் ஆறு மாவட்டங்களில் 92,731 நபர்கள் கடுமையாகப் பாதிக்கப்பட்டுள்ளதாக அனர்த்த முகாமைத்துவ நிலையம் குறிப்பிட்டுள்ளது.

நிலவும் வரட்சியான காலநிலை காரணமாக யாழ்ப்பாணம், மன்னார் திருகோணமலை, இரத்தினபுரி, குருநாகல் மற்றும் புத்தளம் ஆகிய பகுதிகளில் 28,837 குடும்பங்கள் குடிநீர் பற்றாக்குறையை எதிர்கொள்வதாக அனர்த்த முகாமைத்துவ மத்திய நிலையம் தெரிவித்துள்ளது.

யாழ்ப்பாணத்தில் 69,000 இற்கும் மேற்பட்ட நபர்கள் வரட்சியினால் பாதிக்கப்பட்டுள்ளனர், மேலும் சங்கானைப் பிரதேசம் ஜூன் மாதத்திற்குப் பிறகு மிகவும் பாதிக்கப்பட்டுள்ளது.

இதேவேளை, எதிர்வரும் ஒக்டோபர் மாதம் வரை போதிய மழை பெய்யாது என வளிமண்டலவியல் திணைக்களம் தெரிவித்துள்ளது.

தென்மேற்கு பருவமழை இந்தாண்டு இலங்கையில் போதிய மழையைப் பெறவில்லை, எல் நினோ விளைவு காரணமாக இருக்கலாம் என வானிலை ஆய்வு மையம் குறிப்பிட்டுள்ளது.

வருடாந்தம் ஒக்டோபர் மற்றும் நவம்பர் மாதங்களில் தீவின் பெரும்பாலான பகுதிகளில் அதிக மழைப்பொழிவு பதிவாகும்.