அமெரிக்காவின் பிலடெல்பியா நகரில் ஒரு பில்லியன் அமெரிக்க டொலர் பெறுமதியான கொக்கெய்ன் போதைப்பொருள் கைப்பற்றப்பட்டுள்ளது. அமெரிக்க வரலாற்றில் அதிகூடிய கொக்கெய்ன் போதைப்பொருள் கைப்பற்றப்பட்ட சந்தர்ப்பம் இதுவென அமெரிக்க தகவல்கள் தெரிவிக்கின்றன.
16.5 தொன் எடையுடைய கொக்கெய்ன் போதைப்பொருள் பிலடெல்பியா பகுதியில் கப்பலொன்றில் இருந்து மீட்கப்பட்டுள்ளது. 7 கொள்கலன்களில் இருந்து இவை மீட்கப்பட்டுள்ளதாக சர்வதேச செய்திகள் தெரிவிக்கின்றன.
இதுதொடர்பில் கப்பல் ஊழியர்கள் இருவர் கைது செய்யப்பட்டுள்ளதாக அமெரிக்க தகவல்கள் தெரிவிக்கின்றன. இதேவேளை கொக்கெய்ன் கைப்பற்றப்பட்ட குறித்த கப்பல் கடந்த மாதத்தில் சிலி, பெரு, கொலம்பியா மற்றும் பனாமா ஆகிய நாடுகளுக்கு பயணம் மேற்கொண்டதாக விசாரணைகளில் கண்டறியப்பட்டுள்ளதாக அமெரிக்க அதிகாரிகள் தெரிவிக்கின்றனர்.
