මෙරට නිෂ්පාදිත උන්ඩ හයක් යෙදවිය හැකි රිවෝල්වරයක් සහ තියුණු ආයුධ දෙකක් සමග “වෙන්දේසිවත්තේ සුද්දා” කළුතර අපරාධ කොට්ඨාසය මගින් අත්අඩංගුවට ගෙන තිබෙනවා.
දැනට මාස කිහිපයක සිට කළුතර, ඈතගම ,පයාගල, වෙන්දේසි වත්ත, නාගොඩ, ප්‍රදේශවල ගිනි අවී සහ තියුණු ආයුධ යොදාගෙන මිනිසුන් බිය ගැද්දීම් පහරදීම් සිදුවන බවට ලද තොරතුරක් මත කළුතර අපරාධ කොට්ඨාසයේ පොලිස් නිලධාරීන් සිදු කළ වැටලීමකදීයි මෙම සැකකරු පිළිබඳ තොරතුරු අනාවරණය වී තිබෙන්නේ.
ඔහුගෙන් සිදු කරන ලද ප්‍රශ්න කිරීම් වලදී කළුතර වෙනිවැල්කැටිය වෙන්දේසිවත්තේ ඔහුගේ නිවසේ කාමරයක සඟවා තිබූ තවත් තියුණු ආයුධ දෙකක්ද පොලිස් භාරයට ගෙන තිබෙනවා.
මෙම සැකකරුට මීට පෙරද පුද්ගල පහරදීම් බිය වැද්දීම් ඇතුළු චෝදනා රැසක් සම්බන්ධයෙන් පොලිසිය විසින් ඔහු අත්අඩංගුවට ගැනීම් සඳහා කටයුතු කරන ලද පුද්ගලයෙකු වනවා.
දැනට මාස දෙකකට පෙර පයාගල ප්‍රදේශයේ නිවසකට ඇතුළු වී එම නිවසේ පුද්ගලයකුට තියුණු ආයුධවලින් පහරදී බරපතල තුවාල සිදු කර තිබෙනවා.
එම පහරදීම සඳහා යතුරුපැදියකින් තවත් පුද්ගලයින් දෙදෙනකු සමග ඔහු පැමිණ ඇති අතර, අනෙක් සැකකරුවන් සොයාද විමර්ශන කටයුතු සිදු කරනවා.
එම නිවසට පහරදීමට පැමිණෙන ආකාරය එම නිවසේ සවි කර තිබූ කැමරාවක සටහන්ව තිබුණා.
මෙම ගිනි අවිය කිසියම් අපරාධයක් සඳහා භාවිතා කළේද යන්න පිළිබඳව පොලිස් විමර්ශන ක්‍රියාත්මක අතර ඔහු සන්තකයේ තවත් ගිණි අවී ඇත්දැයි ඉදිරි විමර්ශන ක්‍රියාත්මක බව කළුතර අපරාධ කොට්ඨාසය කියා සිට සැකකරු අද දින මතුගම මහේස්ත්‍රාත් අධිකරණයට ඉදිරිපත් කිරීමට නියමිතයි.
