හිටපු ජනාධිපතිවරුන්ගේ ආරක්ෂාව වෙනුවෙන් වසරකට වෙන් කර ඇති මුදල් ප්‍රමාණය සමස්ත පොලිස් නිලධාරීන්ට ඖෂධ ලබා ගැනීමට වෙන් කර ඇති මුදලටත් වඩා වැඩි බව අමාත්‍ය මණ්ඩලයේ මාධ්‍ය ප්‍රකාශක, අමාත්‍ය විජිත හේරත් මහතා අවධාරණය කරනවා .
අමාත්‍යවරයා මේ බව සඳහන් කළේ ඊයේ (06) රජයේ ප්‍රවෘත්ති දෙපාර්තමේන්තුවේ පැවති කැබිනට් තීරණ දැනුම් දීමේ මාධ්‍ය සාකච්ඡාවට එක් වෙමින් .
හිටපු ජනාධිපතිවරුන්ගේ ආරක්ෂාව සම්බන්ධයෙන් මාධ්‍යවේදියෙකු යොමු කළ ප්‍රශ්නයකට පිළිතුරු ලබා දෙමින් අමාත්‍යවරයා පෙන්වා දුන්නේ ඒ වෙනුවෙන් සියයකට වඩා පොලීසියේ සහ හමුදාවේ නිලධාරීන් යොදවා ඇති අතර ඇතැම් ජනාධිපතිවරුන්ට 180ක පමණ ආරක්ෂක නිලධාරීන් පිරිසක් යොදවා ඇති බවයි.
ආරක්ෂක භටයන් පමණක් නොව ආරක්ෂක රථ, බස්රථ , ඩිෆෙන්ඩර් , ත්‍රීරෝද රථ , බයිසිකල්, ගිලන්රථ ආදී සියල්ල සපයා ඇති අතර දළ වශයෙන් පොලීසියේ ආරක්ෂව ලබා දීම සහ සෙසු නඩත්තු කටයතු වියදම් සඳහා රුපියල් මිලියන 1100 පමණ වැය වන බවට ගණන් බලා ඇති බවද අමාත්‍යවරයා අවධාරණය කර සිටියා .
වසරකට වැයවන මෙම වියදම පොලිස් රෝහලේ වසරකට වැයවන වියදමට වඩා වැඩි බව පෙන්වා දුන් අමාත්‍යවරයා මෙවැනි කටයුතු වෙනස් කළ යුතු බවයි පෙන්වා දුන්නේ.
ඒ වෙනුවෙන් කමිටුවක් පත් කර ඇති අතර කමිටුවේ නිර්දේශ මත ඉදිරියේදී කැබිනට් පත්‍රිකාවක් ඉදිරිපත් කෙරෙන බවත් එම කැබිනට් පත්‍රිකාව අනුව හිටපු සියලු ජනාධිපතිවරුන්ට සමානුපාතික ක්‍රමයට ආරක්ෂාවට අදාළ පියවර ගන්නා බව අමාත්‍යවරයා පෙන්වා දී තිබෙනවා .
ඒ මහතා ප්‍රකාශ කළේ විශේෂ ආරක්ෂක අවශ්‍යතාවන් සහිත හිටපු ජනාධිපතිවරුන් වෙනුවෙන් විශේෂ වශයෙන් ආරක්ෂාව ලබා දීමට පියවර ගන්නා බවයි.
හිටපු ජනාධිපති චන්ද්‍රිකා බණ්ඩාරනායක මහත්මියට ලබා දී ඇති ආරක්ෂාව ඉවත් කර නොමැති බවත් ඇයට මේ වනවිටත් 57දෙනෙකු ආරක්ෂාව සඳහා යොදවා ඇති බවත් අමාත්‍යවරයා වැඩිදුරටත් කරුණු දක්වමින් ප්‍රකාශ කර සිටිනවා .
