මෙවර ජනාධිපතිවරණය ජුලි මස 26 වනදා ප්‍රකාශයට පත්කළ අතර නාමයෝජනා භාරදෙනු ලැබුවේ අගෝස්තු මස 15 වනදායි.
ඒ අනුව ජුලි මස 26 වනදා සිට මේ දක්වා කාල සීමාව තුළ දින 50කට ආසන්න කාලයක් දේශපාලන පක්‍ෂ වලට සහ අපේක්ෂකයන්ගේ මැතිවරණ ප්‍රචාරණ කටයුතු සඳහා ලබාදී තිබුණා.
නමුත් මැතිවරණ නිරීක්‍ෂණ සංවිධානයක් ලෙස අපට නිරීක්‍ෂණය වූයේ මැතිවරණය ප්‍රකාශයට පත්කිරීමට මාස 3කට පෙර සිටම ජනාධිපතිවරණය ඉලක්ක කර ගෙන දේශපාලන පක්‍ෂ විසින් ප්‍රාදේශීය මට්ටමින් රැස්වීම ගණනාවක් පවත්වා ගෙන ගිය බවයි.
මේ අනුව දින 50 කුත් මාස 3ක් වැනි විශාල කාලයක් අපේක්ෂකයින් විසින් මැතිවරණ ප්‍රචාරක කටයුතු සඳහා යොදාගෙන තිබුණා.
කෙසේ වෙතත් අද මධ්‍යම රාත්‍රියෙන් පසුව එම මැතිවරණ ප්‍රචාරක කටයුතු අවසන් කරන ලෙස මැතිවරණ කොමිසම දැනුම් දී තිබෙනවා.
විශේෂයෙන් මෙම නිහඬ කාල සීමාව ලබා දෙන්නේ ඡන්ද දායකයට නිරවුල් මනසකින් තීරණක් ගැනීමට අවස්තාව ලබා දීමටයි.
මේ නිසා එම කාල සීමාව තුළ ගෙයින්ගෙට ගොස් ප්‍රචාරණ කටයුතු සිදු කිරීමට හෝ ඡන්දදායකයින්ට අල්ලස් ලබාදීමට හෝ සමාජ මාධ්‍ය භාවිත කරමින් ප්‍රචාරණ කටයුතු සිදු කිරීමෙන් වළකින ලෙස කැෆේ සංවිධානය සියලුම දේශපාලන පක්‍ෂ ලේකම්වරුන්ගෙන් සහ අපේක්ෂකයින්ගෙන් ඉල්ලා සිටිනවා.
පසුගිය මැතිවරණ වලදී නිහඬ කාලසීමවේදී මෙවැනි සිද්ධීන් පිළිබඳව පැමිණිලි ලැබී ඇති නිසා ඒ පිළිබඳව වැඩි අවධානයක් යොමු කරන ලෙස කැෆේ සංවිධානය සියලුම දේශපාලන පක්‍ෂ වලින් හා අපේක්ෂකයින්ගෙන් ඉල්ලීමක් කරනවා.
