කටාර් චැරිටී සංවිධානය විසින් කුරුණෑගල, මාතලේ සහ මොණරාගල දිස්ත්රික්කවල එළවළු වගාවේ නිරතවන අඩු ආදායම්ලාභී පවුල්වල ගොවීන් 3476කට නොමිලයේ යුරියා, මඩ පොහොර හා බණ්ඩි පොහොර ලබා දීමට කටයුතු යොදා තිබෙනවා.
මෙම පොහොර තොගය නිල වශයෙන් කෘෂිකර්ම හා වැවිලි කර්මාන්ත අමාත්යාංශයට බාර දිම පසුගියදා සිදු වුණා.
කෘෂිකර්ම හා වැවිලි කර්මාන්ත අමාත්ය මහින්ද අමරවීර මහතාගේ ප්රධානත්වයෙන් පැවැති එම වැඩ සටහනට පශු සම්පත් සංවර්ධන රාජ්ය අමාත්ය ඩී. බී. හේරත්, කටාර් චැරිටි ආයතනයේ ශ්රී ලංකාවේ අධ්යක්ෂ මොහම්මඩ් එස්. එම්. අබුකලිෆ් මහතා ඇතුළු පිරිසක් සහභාගි වූණා.
කෘෂිකර්ම අමාත්යාංශයේ ලේකම් ජානක ධර්මකීර්ති මහතා ද මෙම අවස්ථාවට සහභාගි වූණා.
අප රටේ ආහාර සුරක්ෂිතතාවය සැළකිල්ලට ගනිමින් කටාර් චැරිටි ආයතනය මෙම පියවර ගෙන ඇති අතර මෙම වැඩ සටහන යටතේ කුරුණෑගල එලළුලු ගොවීන් 1476ක්, මාතලේ දිස්ත්රික්කයේ ගොවීන් 1000ක් හා මොණරාගල දිස්ත්රික්කයේ ගොවීන් 1000කට එළවළු වගාව සඳහා මෙම පොහොර නොමිලයේ ලබා දීමට නියමිතයි.
මේ යටතේ එක් ගොවියෙකුට යුරියා, මඩ පොහොර හා බණ්ඩි පොහොර කිලෝ ග්රෑම් 25ක පොහොර මිටියක් බැගින් ලබා දීමට කටයුතු යොදා තිබෙනවා.
මෙම අවස්ථාවට සහභාගි වූ කෘෂිකර්ම හා වැවිලි කර්මාන්ත අමාත්ය මහින්ද අමරවීර මහතා මෙසේ අදහස් පළ කළා,
පසුගිය කාලය තුළ අපි වී, තේ, පොල්, කුරුඳු ආදි වගාවන් සඳහා පොහොර සහනාධාර ලබා දුන්නත් එළවළු ගොවීන්ට පොහොර සහනාධාර වශයෙන් ලබා දීමට හැකි වුනේ නැහැ.
එයට හේතුව නම් රටේ ඇති මුදල් තත්ත්වය යහපත් නොවීමයි.
නමුත් කටාර් චැරිටි සංවිධානය එළවළු වගා කරන ගොවීන් යම් ප්රමාණයකට නොමිලයේ පොහොර ලබා දීමට අද ඉදිරිපත් ව සිටිනවා.
මෙම සංවිධානය තුළ ක්රියාත්මක වන්නේ කටාර් රාජ්යයේ ජනතාවගේ මුදල්.
අපේ රටේ ආහාර සුර්කෂිතතාවය උදෙසා මෙවැනි පරිත්යාගයක් සිදු කළ කටාර් රජයට මෙන්ම කටාර් චැරිටි ආයතනයට අපේ රජයේ කෘතඥතාවය පළකරන බව ද අමාත්යවරයා පැවසුවා.
