fbpx

Life+News The Official News Portal of Independent Television Network Ltd

” හදමු අලුත් රටක් ” යන තේමාව යටතේ 76වන නිදහස් දිනය සැමරීමට සියල්ල සූදානම්

ITN News Editor
By ITN News Editor පෙබරවාරි 4, 2024 05:07

” හදමු අලුත් රටක් ” යන තේමාව යටතේ 76වන නිදහස් දිනය සැමරීමට සියල්ල සූදානම්

” හදමු අලුත් රටක් ” යන තේමාව යටතේ 76වන ජාතික නිදහස් දිනය ජනාධිපති රනිල් වික්‍රමසිංහ මහතාගේ සහ අග්‍රාමාත්‍ය දිනේෂ් ගුණවර්ධන මහතාගේ ප්‍රධානත්වයෙන් ගාලු මුවදොර පිටියේදි අද පැවැත් වේ.

මෙවර නිදහස් සමරු උළෙලේ ප්‍රධාන ආරාධිතයා ලෙස තායිලන්ත අග්‍රාමාත්‍ය ස්‍රෙතා තැවිසින් මහතා සහභාගී වනවා.

නිදහස් දිනයට සමගාමීව ශ්‍රී ලංකාව සහ තායිලන්තය අතර ද්වී පාර්ශවික වෙළෙඳ ගිවිසුමක් අත්සන් කිරීමට නියමිතයි.

සර්ව ආගමික නායකයන්, පක්ෂ විපක්ෂ දේශපාලන නියෝජිතයින් , යුධ ගුවන් නාවික ත්‍රිවිධ හමුාදපතිවරුන්, තානාපති කාර්යාල ප්‍රධානීන් ඇතුළු පිරිස් සැමරුම් උත්සවය සඳහා සහභාගී වනු ඇති.

මෙවර නිදහස් දින සැමරුම සඳහා යුධ, ගුවන්, නාවික, පොලිස් , සිවිල් ආරක්ෂක බළකා සහ ශිෂ්‍ය භට සාමාජික සාමාජිකාවයන් 6000කට අධික පිරිසක් සහභාගී වනවා.

ජාතික නිදහස් දින සම්භාවනීය ආරාධිතයාගේ සම්ප්‍රාප්තියත් සමඟ අභිමානවත් ජාතික නිදහස් උලෙළ ආරම්භ  වේ.

අද දිනයේදී ජනාධිපති කාර්යාලයීය නිලධාරින්ගේ සහභාගිත්වයෙන්, ජනාධිපති කාර්යාලය ඉදිරිපිට පිහිටුවා ඇති නිදහස් සටනේ ජාතික විරු ප්‍රතිමා අබියස පුෂ්පෝපහාර පිරිනැමීම උදෑසන 6.30ට සිදු කෙරේ.

ජාතික නිදහස් දින උලෙළේ මඟුල් බෙර වාදනය හා සක් පිඹීම සංස්කෘතික කටයුතු දෙපාර්තමේන්තුවේ රාජ්‍ය නර්තන කණ්ඩායමේ ශිල්පීන් විසින් සිදු කරනු ලබයි.

ජාතික ගීය ගායනා කිරීම කොළඹ ආරක්ෂක සේවා විදුහල, තර්ස්ටන් විදුහල සහ මහානාම විදුහල, මුස්ලිම් කාන්තා විදුහල, රාජකීය විදුහල, රාමනාදන් හින්දු විදුහල, සහිරා විදුහල, සී. ඩබ්. ඩබ්. කන්නන්ගර මහා විදුහල, සාන්ත අන්තෝනි බාලිකා විදුහල, සාන්ත පීතර විදුහල, හින්දු විදුහල යන විදුහල්වල සිසු සිසුවියෝ 100 දෙනකු විසින් සිදු කරනු ලබති. එහි සංගීතය මෙහෙයවීම සිදු කරන්නේ ශ්‍රී ලංකා නාවික හමුදාවේ පෙරදිග වාද්‍ය වෘන්දය විසිනි.

ජයමංගල ගාථා සහ දේවෝ වස්සතු කාලේන ගාථාව ගායන කිරීම සිදු කරන්නේ කොළඹ දේවි බාලිකා විද්‍යාලය, විශාකා විද්‍යාලය, සිරිමාවෝ බණ්ඩාරනායක විදුහල යන විදුහල්වල සිසුවියන් 25 දෙනකු විසින් වන අතර ශ්‍රී ලංකා නාවික හමුදාවේ පෙරදිග වාද්‍ය වෘන්දය සංගීතය මෙහෙයවයි.

මෙවර ආචාර පෙළපාළිය සඳහා ශ්‍රී ලංකා යුද හමුදාවේ සාමාජිකයන් 3042ක්, සන්නද්ධ රථ 77ක්, ශ්‍රී ලංකා නාවික හමුදාවේ සාමාජිකයන් 917ක්, සන්නද්ධ රථ 7ක්, ශ්‍රී ලංකා ගුවන් හමුදාවේ සාමාජිකයන් 605ක් සන්නද්ධ රථ 27ක්, ශ්‍රී ලංකා පොලීසියේ සාමාජිකයන් 299ක්, ශ්‍රී ලංකා පොලිස් විශේෂ කාර්ය බළකායේ සාමාජිකයන් 209ක්, සිවිල් ආරක්ෂක බළකායේ සාමාජිකයන් 379ක්, ජාතික ශිෂ්‍යභට බළකායේ සාමාජිකයන් 500ක්, විශ්‍රාමික නිලධාරින් 22ක්, ආබාධිත නිලධාරීන් 29කින් සමන්විත වේ.

ITN News Editor
By ITN News Editor පෙබරවාරි 4, 2024 05:07

ව්‍යාපාරික පුවත්- තවත් මෙතනින්

ක්‍රීඩා පුවත්- තවත් මෙතනින්

රස බර- තවත් මෙතනින්