fbpx

Life+News The Official News Portal of Independent Television Network Ltd

දරුවන්ගේ ජීවිත ජයග්‍රහණය කරවිය හැකි එකම මාර්ගය අධ්‍යාපනය – ජනාධිපති ලේකම්

ITN News Editor
By ITN News Editor ජනවාරි 17, 2024 11:31

දරුවන්ගේ ජීවිත ජයග්‍රහණය කරවිය හැකි එකම මාර්ගය අධ්‍යාපනය – ජනාධිපති ලේකම්

දරුවන්ගේ ජීවිත ජයග්‍රහණය කිරීමට තිබෙන එකම මාර්ගය අධ්‍යාපනය බව ජනාධිපති ලේකම් සමන් ඒකනායක මහතා අවධාරණය කළා.

අධ්‍යාපන කටයුතු සාර්ථකව නිම කිරීම තුළින් දැනුම්වත් පුරවැසියකු රටට බිහිවන බවත් එය රටේ සාර්ථකත්වයට සෘජුව බලපාන බවත් ජනාධිපති ලේකම්වරයා පෙන්වා දුන්නා.

ජනාධිපති ලේකම් සමන් ඒකනායක මහතා මේ බව සඳහන් කර සිටියේ නවගත්තේගම කෝන්කඩවල විද්‍යාලයට අංග සම්පූර්ණ පුස්තකාලයක් ලබාදීම වෙනුවෙන් පසුගිය (15)දා පැවති උත්සවයට එක්වෙමින්.

චීන මූල්‍යාධාර යටතේ ජනාධිපති ලේකම් සමන් ඒකනායක මහතාගේ මඟපෙන්වීම අනුව ජනාධිපති කාර්යාලයේ මැදිහත්වීමෙන් නවගත්තේගම කෝන්කඩවල විද්‍යාලයට හා මීගමුව දූව කනිෂ්ඨ විද්‍යාලයට අංග සම්පූර්ණ පුස්තකාල දෙකක් ලබාදීමට කටයුතු කෙරුණා.

එක් පුස්තකාලයක් සඳහා වැය කර ඇති මුදල රුපියල් මිලියන දෙකක් වන අතර 6 ශ්‍රේණියේ සිට 11 ශ්‍රේණිය දක්වා දරුවන්ට අධ්‍යාපන කටයුතු සඳහා අවශ්‍ය පොත්පත් රාශියක් මෙම පුස්තකාලවලට ඇතුළත්.

ආර්ථික දුෂ්කරතා මධ්‍යයේ සිය අධ්‍යාපන කටයුතු සිදු කරනු ලබන ග්‍රාමීය සිසු දරුවන්ට අත්වැලක් වෙමින් දැනුමෙන් පෝෂිත අනාගත පරපුරක් බිහි කිරීම මඟින් රටේ ඉදිරි අනාගතය සාර්ථකත්වය කරා ගෙන යාම මෙම වැඩසටහනේ මූලික අරමුණයි.

මෙහිදී අදහස් දැක්වූ ජනාධිපති ලේකම් සමන් ඒකනායක මහතා මෙසේද පැවසුවා.

“පසුගිය වසරේ දෙසැම්බර් මාසයේදී ශ්‍රී ලංකාවේ චීන නියෝජ්‍ය තානාපතිවරයා රුපියල් මිලියන හතරක ව්‍යාපෘතියක් සඳහා ආධාර කිරීමට හැකියාව තිබෙන බව මා සමඟ පැවසුවා.

එහිදී පාසල් දෙකක් තෝරා ගෙන ඊට පුස්තකාල දෙකක් ලබාදීමට මා කල්පනා කළා.

මෙම පාසල්වලට පුස්තකාල ලබාදීමට කල්පනා කළේ විශේෂ හේතුවක් ඇතිවයි.

ඉදිරි අවුරුදු දහය තුළ මෙම පාසල්වලට පැමිණෙන දුවා දරුවන්ට මෙම පුස්තකාල හොඳින් භාවිතා කළ හැකියි.

මමත් ප්‍රාථමික අධ්‍යාපනය ලැබුවේ මෙවැනි කුඩා පාසලකයි.

ඒ නිසා මේ දරුවන්ගේ අනාගතය දැන්ම කියන්න නොහැකිවුවත් ඔවුන්ගේ ජීවිතය ඉදිරියට ගෙන යාමට අවශ්‍ය සහයෝගය ලබාදීම අප කළ යුතුයි.

මට දැනගන්න ලැබුණු පරිදි අද මෙහි සිටින චීන නියෝජ්‍ය තානාපතිතුමාගේ පියා ගොවියෙක්.

චීන නියෝජ්‍ය තානාපතිවරයා 8 ශ්‍රේණියේ ඉගෙණුම ලබන විට ගොයම් සිටුවීමට පැමිණෙන ලෙස පියා ඔහුට කියා තිබෙනවා .

පැයක් පමණ ගොයම් සිටුවීමේදී එතුමාගේ කොන්දේ විශාල වේදනාවක් ඇතිව තිබෙනවා.

කොන්ද වේදනාව පියාට පැවසූ විට ” ඔබ හොඳට ඉගෙන ගත්තේ නැතිනම් කරන්න වෙන්නේ මේ රැකියාව “බව පියා පවසා තිබෙනවා.

ඒ පාඩම හිතට ගත් එතුමා අද නියෝජ්‍ය තානාපතිවරයෙක් දක්වා සාර්ථකව ඉදිරියට පැමිණ තිබෙනවා.

ජාත්‍යන්තර වශයෙන් රට රටවල් වල සේවය කරන මට්ටමට පැමිණ තිබෙනවා.

ඒනිසා මේ දරුවන් හිතට ගන්න ඕන ජීවිතය ජයග්‍රහණය කිරීමට තිබෙන එකම මාර්ගය අධ්‍යාපනය බව.

අධ්‍යාපනයෙන් තොරව දරුවන්ට හෝ රටකට අනාගතයක් නොමැති බව පිළිගත යුතුයි.

රාජ්‍ය අමාත්‍ය අරුන්දික ප්‍රනාන්දු, පාර්ලිමේන්තු මන්ත්‍රී කාවින්ද ජයවර්ධන, ශ්‍රී ලංකාවේ චීන නියෝජ්‍ය තානාපති යන්වෙයි ෂු මහතා ( YANWAI ZHU) සහ අධ්‍යාපන අමාත්‍යංශයේ නිලධාරීන් පිරිසක්ද විදුහල්පතිවරු, ආචාර්ය මණ්ඩලය, දෙමාපියන් ඇතුළු සිසු දරුවන් පිරිසක් මෙම අවස්ථාවට එක්ව සිටියා.

ITN News Editor
By ITN News Editor ජනවාරි 17, 2024 11:31

ව්‍යාපාරික පුවත්- තවත් මෙතනින්

ක්‍රීඩා පුවත්- තවත් මෙතනින්

රස බර- තවත් මෙතනින්