fbpx

Life+News The Official News Portal of Independent Television Network Ltd

ශ්‍රී ලංකා ආර්ථිකය ලබා තිබෙන කැපී පෙනෙන ප්‍රගතිය ජපාන මුදල් අමාත්‍යවරයාගේ පැසසුමට

ITN News Editor
By ITN News Editor ජනවාරි 12, 2024 16:52

ශ්‍රී ලංකා ආර්ථිකය ලබා තිබෙන කැපී පෙනෙන ප්‍රගතිය ජපාන මුදල් අමාත්‍යවරයාගේ පැසසුමට

 ජනපතිගේ නිවැරදි ආර්ථික වැඩපිළිවෙළ එම ප්‍රගතියට හේතු වුණා

 ජපාන ආධාර යටතේ ආරම්භ කර අතරමග නැවති ඇති සංවර්ධන ව්‍යාපෘති
කඩිනමින් ඇරඹීමට අවධානය

– ජපාන මුදල් අමාත්‍ය සුසුකි ෂුනිචි

ශ්‍රී ලංකා ආර්ථිකය ලබා තිබෙන කැපී පෙනෙන ප්‍රගතිය ජපාන මුදල් අමාත්‍ය සුසුකි ෂුනිචි
( SUZUKI Shunichi) මහතාගේ දැඩි ප්‍රසාදයට ලක් වෙයි.

මෙරට දළ දේශිය නිෂ්පාදිතයේ දර්ශක සහ උද්ධමන දර්ශකවල ධනාත්මක ප්‍රවණතා පෙන්වා දුන් ජපාන මුදල් අමාත්‍යවරයා එම ප්‍රගතිය ශ්‍රී ලංකාවට අත් කර ගැනීමට හැකි වූයේ ජනාධිපති රනිල් වික්‍රමසිංහ මහතාගේ නිවැරදි ආර්ථික වැඩපිළිවෙළ නිසා බවද සඳහන් කළා.

ජපාන මුදල් අමාත්‍ය සුසුකි ෂුනිචි මහතා (H.E. Mr. SUZUKI Shunichi) මේ බව සඳහන් කර සිටියේ ඊයේ  පස්වරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ මහතා හමු වූ අවස්ථාවේදීය.

ජපානය සහ ශ්‍රී ලංකාව අතර ආර්ථික සබඳතා තවදුරටත් පුළුල් කර ගැනීමේ අරමුණින් ජපාන මුදල් අමාත්‍යවරයා මෙරට දෙදින නිල සංචාරයක නිරතව සිටියි.

ශ්‍රී ලංකා ආර්ථිකය යළි නඟා සිටුවීමේ දී ආර්ථික ස්ථායීකරණය සහ ණය තිරසාරභාවය පිළිබඳ අවධානය යොමු කරමින් සුවිශේෂී ආර්ථික ප්‍රතිසංස්කරණ රැසක් මේ වන විට රජය ආරම්භ කර ඇති බව ජනාධිපති රනිල් වික්‍රමසිංහ මහතා මෙහිදී පැවසුවා.

ශ්‍රී ලංකාවේ ණය අර්බුදය විසඳා ගැනීමට සහ වත්මන් ආර්ථික ස්ථාවරත්වය උදා කර ගැනීම වෙනුවෙන් ජපාන රජය ලබාදුන් සුවිශේෂී සහාය පිළිබඳවද ජනාධිපතිවරයා මෙහිදී කෘතවේදීව සිහිපත් කළා.

එසේම ණය ප්‍රශස්තකරණ වැඩසටහනේ සාර්ථකත්වය පිළිබඳවද මෙහිදී සාකච්ඡාවට ලක් වූ අතර ණය ප්‍රශස්තකරණ ක්‍රියාවලියේ දි විනිවිදභාවයෙන් යුතු ප්‍රතිපත්තියක් පවත්වාගෙන යාමේ වැදගත්කම ද සාකච්ඡා කළා

ශ්‍රී ලංකාවේ ණය අර්බුදය හේතුවෙන් යෙන් මුදල් ඒකකයෙන් ලබා දී තිබූ ණය අත්හිටුවීම පිළිබඳ සඳහන් කළ ජපාන මුදල් අමාත්‍ය සුසුකි ෂුනිචි මහතා, නිල ණය හිමියන්ගේ කමිටුව (OCC) සමඟ යෝජිත අවබෝධතා ගිවිසුමට එළැඹීමෙන් පසුව සහ ජාත්‍යන්තර මූල්‍ය අරමුදල විසින් අධීක්ෂණය කරනු ලබන ණය තිරසරභාවය ප්‍රකාශ කිරීමෙන් අනතුරුව එම ණය මුදල් නැවත ලබාදීමේ හැකියාව පවතින බව සඳහන් කළා.

තොරතුරු තාක්ෂණය, සමුද්‍රීය ආරක්ෂාව ඇතුළු ක්ෂේත්‍ර රැසක් ඔස්සේ ජපානය සහ ශ්‍රී ලංකාව අතර සබඳතා තවදුරටත් පුළුල් කර ගැනීම පිළිබඳවද මෙහිදී දීර්ඝ ලෙස සාකච්ඡා වූ අතර ශ්‍රී ලංකාවේ ඉදිරි ගමන වෙනුවෙන් ජපාන රජයෙන් ලබාදිය හැකි පූර්ණ සහාය ලබාදෙන බව ද ජපාන මුදල් අමාත්‍යවරයා ප්‍රකාශ කළා.

ජපානය සහ ශ්‍රී ලංකාව අතර සමීප සබඳතා තවදුරටත් වර්ධනය කර ගැනීමට තමා කැපවී සිටින බව මෙහිදී අවධාරණය කළ ජනාධිපති රනිල් වික්‍රමසිංහ මහතා විශේෂයෙන් තරගකාරී හරිත ආර්ථිකයක් සහ ඩිජිටල් ආර්ථිකයක් වෙනුවෙන් තවදුරටත් සහයෝගයෙන් කටයුතු කිරීමේ අවශ්‍යතාව පෙන්වා දුන්නා.

වෙළෙඳ ශේෂය හිතකර මට්ටමක පවත්වාගැනීම සඳහා අපනයන කෙරෙහි අවධානය යොමු කිරීම වැදගත් බව සඳහන් කළ ජනාධිපතිවරයා, ශ්‍රී ලංකාව සඳහා නව ආර්ථික ආකෘතියක් ඇති කර ගැනීම පිළිබඳ අවධානය යොමුව ඇති බව ද පැවසුවා.

ණය ප්‍රශස්තකරණ වැඩසටහන මෙම වසරේ පළමු කාර්තුව තුළ අවසන් කිරීම ශ්‍රී ලංකාවේ ඉලක්කය බව ණය ප්‍රශස්තකරණ ක්‍රියාවලියේ ප්‍රගතිය පිළිබඳ සඳහන් කරමින් මෙහිදී ශ්‍රී ලංකා නියෝජිත පිරිස විසින් ජපාන නියෝජිත පිරිස දැනුවත් කරන ලදී.

කටුනායක බණ්ඩාරනායක ජාත්‍යන්තර ගුවන්තොටුපොල ප්‍රතිසංවර්ධනය කිරීම වැනි ව්‍යාපෘති කෙරෙහි ද මෙහිදී විශේෂ අවධානයක් යොමු වූ අතර ජපාන රජයේ ආධාර යටතේ ක්‍රියාත්මක දැනට අතරමග නැවති ඇති සංවර්ධන ව්‍යාපෘති කඩිනමින් යළි ආරම්භ කිරීම පිළිබඳව ද සාකච්ඡා කෙරිණි.

ජපාන දූත පිරිස සහ ශ්‍රී ලංකාව නියෝජනය කරමින් මුදල් රාජ්‍ය අමාත්‍ය ෂෙහාන් සේමසිංහ, ජනාධිපති ලේකම් සමන් ඒකනායක, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්.එච්.එස් සමරතුංග, මහබැංකු අධිපති ආචාර්ය නන්දලාල් වීරසිංහ යන මහත්වරුන් මෙම අවස්ථාවට එක්ව සිටියා.

 

ITN News Editor
By ITN News Editor ජනවාරි 12, 2024 16:52

ව්‍යාපාරික පුවත්- තවත් මෙතනින්

ක්‍රීඩා පුවත්- තවත් මෙතනින්

රස බර- තවත් මෙතනින්