fbpx

Life+News The Official News Portal of Independent Television Network Ltd

ශ්‍රී ලංකාව විශ්වවිද්‍යාල කේන්ද්‍රස්ථානයක් බවට පත් කළ යුතුයි – ජනපති

hasiniek
By hasiniek දෙසැම්බර් 11, 2023 15:35

ශ්‍රී ලංකාව විශ්වවිද්‍යාල කේන්ද්‍රස්ථානයක් බවට පත් කළ යුතුයි – ජනපති

විශ්වවිද්‍යාල අධ්‍යාපනය සහ වෘත්තීය පුහුණු අධ්‍යාපනය රටේ දියුණුවට යොදා ගැනීමේ වැඩපිළිවෙළ ලබන වසරේ ආරම්භ කරන බව ජනාධිපති රනිල් වික්‍රමසිංහ මහතා පවසනවා.

රට දියුණුව කරා ගෙන යාමට නම් දැනුම ඇති මානව සම්පතක් අවශ්‍ය බව පැවසූ ජනාධිපතිවරයා එහි වගකීම මෙරට විශ්වවිද්‍යාල ක්ෂේත්‍රයට සහ වෘත්තීය පුහුණු ක්ෂේත්‍රයට පැවරෙන බව ද සඳහන් කළා.

වෘත්තීය පුහුණු අධ්‍යාපන ක්ෂේත්‍රයේ නව පරිවර්තනයක් වෙනුවෙන් පෞද්ගලික අංශයේ සහාය මේ වන විට පළවි තිබෙන බවත් මෙරට සමස්ත අධ්‍යාපන ක්‍රමය ප්‍රතිසංවිධානයට අවශ්‍ය නීති කඩිනමින් ගෙන එන බවත් ජනාධිපතිවරයා ප්‍රකාශ කළා
.
ජනාධිපති රනිල් වික්‍රමසිංහ මහතා මේ බව සඳහන් කර සිටියේ ජාතික ව්‍යාපාර අධ්‍යයන විද්‍යායතනයේ (NSBM හරිත සරසවිය) 2023 උපාධි ප්‍රදානෝත්සවයට අද (11) පෙරවරුවේ එක් වෙමින්.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මහතා

විශ්වවිද්‍යාලවලින් පිටවන සියලු දෙනාට රැකියා ලබාගත හැකි ආකාරයට අප විශ්වවිද්‍යාල අධ්‍යාපනය පරිවර්තනය කළ යුතුව තිබෙනවා. අද රජයේ විශ්වවිද්‍යාලවලට ඇතුළත් කර ගන්නා සිසුන් ප්‍රමාණය සීමා කර තිබෙනවා. ඒ ප්‍රතිපාදන සපයා ගැනීමේ ගැටළුව නිසයි. නමුත් අනෙක් රටවල් මෙම ප්‍රශ්නයට මුහුණ දී සාර්ථකව තිබෙනවා. “සෑම අයෙකුටම අධ්‍යාපනයට ප්‍රවේශ වීමේ අයිතිය ලබාදිය යුතු බවට” එක්සත් ජාතීන්ගේ මානව හිමිකම් ප්‍රකාශනයේ ද සඳහන් වෙනවා. ඒ අනුව මේ වෙනුවෙන් සෑම රටකම රජයේ සහ පුද්ගලික විශ්වවිද්‍යාල ඇති කර තිබෙනවා. ශ්‍රී ලංකාව ලෙස අපත් දැන් සූදානම්ව සිටින්නේ එම වැඩකටයුත්ත සඳහා යොමු වීමටයි.

ඒ අනුව මෙරට විශ්වවිද්‍යාල සංඛ්‍යාව දෙගුණයකින්, තුන් ගුණයකින් ඉහළ නංවා ගැනීමට අප බලපොරොත්තු වෙනවා. ඒ සමඟම නව තාක්ෂණය සමඟ මෙරට සිට විදේශීය විශ්වවිද්‍යාලවලින් උපාධිය ලබාගැනීමට සිසුන්ට අවස්ථාව හිමි වෙනවා.

ශ්‍රී ලංකාව විශ්වවිද්‍යාල කේන්ද්‍රස්ථානයක් බවට පත්කළ යුතුයි. ඒ වගේම පාසල් සිසුන්ට සහ විශ්වවිද්‍යාල සිසුන්ට ඉංග්‍රීසි දැනුම ලබාදීමේ වැඩකටයුතු 2030 වන විට සම්පූර්ණ කිරීමට අප බලාපොරොත්තු වෙනවා. ඒ වගේම අනෙක් භාෂා දැනුමෙන්ද මෙරට සිසු පරපුර සවිබල ගැන්විය යුතුයි.

ඒ වගේම වෘත්තීය පුහුණු ආයතන ඒකාබද්ධ කර වෘත්තීය පුහුණු විද්‍යාල ඇති කිරීමට අප සැලසුම් කර තිබෙන අතර එම පාඨමාලා සඳහා රැකියා ඉලක්ක කර ගත් නව විෂය මාලා හඳුන්වාදීමට පියවර ගන්නවා. මෙම කටයුතු සඳහා පුද්ගලික අංශයේ වෙළෙඳ මණ්ඩල සහාය ලබාදෙන බවට අපට දැනුම් දී තිබෙන නිසා මෙම වැඩසටහනත් ලබන වසර වන විට ක්‍රියාත්මක කිරීමට හැකියාව ලැබෙනවා.

ඉන් පසුව මෙරට සමස්ත අධ්‍යාපන ක්‍රමය ප්‍රතිසංවිධානය කිරීමට අවශ්‍ය නීති ගෙන ඒම අපේ අපේක්ෂාවයි. මේ අනුව විශ්වවිද්‍යාල අධ්‍යාපනය සහ වෘත්තීය පුහුණු අධ්‍යාපනය මේ රටේ දියුණුව වෙනුවෙන් යොදා ගැනීමේ වැඩපිළිවෙළ ලබන වසරේ සිට ආරම්භ කිරීම අපේ අරමුණ බව කිව යුතුයි. මොකද රට දියුණු කිරීමට දැනුම අවශ්‍යයි. ඒ සඳහා නව අධ්‍යාපන ක්‍රමයක් ඇති කළ යුතුයි.

අප දැනට මධ්‍යම ආදායම් ලබන රටක් ලෙස කටයුතු කළ යුතුයි. අප හැමදාම මෙම තත්ත්වයේ සිටිනවාද, නැත්නම් ඉහළ ආදායම් ලබන ආර්ථිකයක් බවට පත්වෙනවාද කියා තීරණය කළයුතුයි. අපි සියලුදෙනාට අවශ්‍ය එම ගමන යාමටයි. එසේනම් ඒ සඳහා අවශ්‍ය මානව සම්පත ගොඩනැගීම අධ්‍යාපනයට භාර දෙමු.

hasiniek
By hasiniek දෙසැම්බර් 11, 2023 15:35

ව්‍යාපාරික පුවත්- තවත් මෙතනින්

ක්‍රීඩා පුවත්- තවත් මෙතනින්

රස බර- තවත් මෙතනින්