fbpx

Life+News The Official News Portal of Independent Television Network Ltd

මේ දිනවල සිදුවන සෑම මරණයක්ම එන්නතකට හෝ ඖෂධයකට සම්බන්ධ කිරීමේ වැඩපිළිවෙළක් ක්‍රියාත්මකයි

ITN News Editor
By ITN News Editor ජූලි 21, 2023 10:29

මේ දිනවල සිදුවන සෑම මරණයක්ම එන්නතකට හෝ ඖෂධයකට සම්බන්ධ කිරීමේ වැඩපිළිවෙළක් ක්‍රියාත්මකයි

මේ දිනවල සිදුවන සෑම මරණයක්ම එන්නතකට හෝ නිර්වින්දන ඖෂධයකට සම්බන්ධ කිරීමේ වැඩපිළිවෙළක් ක්‍රියාත්මක බවත්, නිදහස් සෞඛ්‍ය සේවාවක් භුක්තිවිදින පිරිසක් ලෙස සත්‍ය තහවුරු කර ගැනීමකින් තොරව එය නොකරන ලෙස සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා ඉල්ලා සිටිනවා.

නිදහස් සෞඛ්‍ය සේවාව වසර ගණනාවක් රට තුළ භුක්තිවිදින බවත්, නිදහස් අධ්‍යාපනයෙන් පැමිණි පුද්ගලයින් ලෙස මෙරට නිදහස් සෞඛ්‍ය සේවාව රැක ගත යුතු බවත් ඒ මහතා ප්‍රකාශ කළා.

සෞඛ්‍ය අමාත්‍යාංශයේ ඊයේ (20) පැවැති මාධ්‍ය හමුවක දී සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා මේ බව පැවසුවා.

සෞඛ්‍ය ක්ෂේත්‍රයේ පිරිස් නිදහස් සෞඛ්‍ය සේවාව ආරක්ෂා කිරීමට කටයුතු කරන බවත්, සත්‍ය සැගවීමට කිසිදු වුවමනාවක් නොමැති බවත්, සත්‍ය තොරතුරු නිවැරදිව ලබාදීමට කටයුතු කරන බවත් ඒ මහතා ප්‍රකාශ කළා.

මෙහිදී වැඩිදුරටත් අදහස් දැක් වූ සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා –

“කළුතර නාගොඩ රෝහලේ නිර්වින්දන සදහා යොදා ගන්නා එන්නත් නොමැති බවටත්, ගැබිණි මව්වරුන් වෙනත් රෝහල්වලට මාරු කර යවන බවටත් මාධ්‍ය ඔස්සේ වාර්තා පළ වී තිබුණා.

මෙම ඖෂධය රෝහලේ අඩු බව අධ්‍යක්ෂතුමිය දැනුම් දුන්නේ පසුගිය 19 වනිදා.

එහිදී එම ඖෂධය අද දින වෛද්‍ය සැපයුම් අංශයට ලැබෙන බවට දැනුම් දුන්නා.

රෝහලේ තිබුණ නිර්වින්දන ඖෂධ 17 ට අමතරව තවත් 50 ක් ප්‍රදානයක් ලෙස එම රෝහලට ලැබී තිබුණා.

ඊයේ රාත්‍රී වන විට අදාළ නිර්වින්දන ඖෂධ 67 ක් රෝහලේ තිබුණා. අද උදේ වෛද්‍ය සැපයුම් අංශයට ලැබුණු අදාළ ඖෂධ මේ වනවිට කළුතර රෝහලට ලබාදීමට කටයුතු කර තිබෙනවා.

ඒ අනුව කළුතර රෝහලේ එම ඖෂධ හිඟය අවසන්ව තිබෙනවා. මෙම ඖෂධය නිසා කිසිදු ගැබිණි මවක් රෝහලට බාර නොගෙන සිටියේ නැහැ.”

“කෑගල්ල රෝහලේ Cefriaxone ප්‍රතිජීවක ඖෂධය ලබාදීම නිසා ඇති වූ ආසාත්මිකතාවයකින් රෝගියෙකු මියගිය බව මාධ්‍ය වාර්තා කර තිබුණා.

මෙම රෝගියා අක්මාව ආශ්‍රිත රෝගී තත්ත්වයක් හේතුවෙන් කෑගල්ල රෝහලට ඇතුළත් කර තිබුණේ මෙම මස 10 වනිදා.

මියගියේ 18 වනිදා.

මේ මිය යාම අපි සාධාරණීය කරන්න යනවා නොවේ.

මෙම රෝගියාට ආසාත්මිකතාවය එ්මට ප්‍රථම මෙම ප්‍රතිජීවක ඖෂධය 14 වරක් ලබාදී තිබෙනවා.

15 වනි අවස්ථාවෙයි ආසාත්මිකතාවය ඇතිවූයේ.

ආසාත්මිකතාවයෙන් පසුව හොද අතට හැරී තිබුණා.

පසුව ඔහුගේ රෝගයේ සංකූලතවයක් හේතුවෙන් රෝහලේ දැඩිසත්කාර ඒකයට ඇතුළත් කළා.

එහිදී රෝගියාගේ පැවැති රෝගී තත්ත්වය අනුව මියගොස් තිබෙනවා.

මේ පිළිබඳව විවෘත තීන්දුවකි ලබාදී තිබෙන්ණේ.

මේ පිළිබඳව පශ්චාත් මරණ පරීක්ෂණයක් සිදු කර තිබෙනවා.

එම පශ්චාත් මරණ පරීක්ෂණයේ තීන්දුව ලැබුණු පසු රෝගියා මියයාමට හේතු වූ නියම හේතුව දැනුම් දිය හැකියි. ”

“මෙරට මන්දපෝෂණ තත්ත්වය පිළිබදව ද මාධ්‍ය වාර්තාවක් අද පළ වී තිබුණා.

වයස අවුරුදු 05 ට අඩු ළමුන් සහ මව්වරුන් ලක්ෂ 08 කට මන්දපෝෂණ තත්ත්වයක් කියලා.

මෙයට පදනම්ව ඇත්තේ 2022 කරන ලද සමීක්ෂණයේ නියැදි දර්ශකයි.

එය නිල දත්ත නොවෙයි. දළ ඇස්තමේන්තු දත්තයි. ජුනි මාසේ තමයි පෝෂණ මාසය තිබුණේ.

එම දත්ත විශ්ලේෂණය මේ වනවිට සිදු කරනවා.

ජුලි මාසය අවසන් වනවිට මෙහි සැබෑ දත්ත තොරතුරු අපට ලබාදෙන්නට පුළුවන්. ”

“මාධ්‍ය සංදර්ශණ තියන්න අපට අවශ්‍යතාවයක් නැහැ.

සත්‍ය එළිකිරීම දෙපාර්තමේන්තුවේ කීර්තිනාමයට කැළලක් ඇති නොවන පරිදි සිදු කළ යුතුයි.

සෞඛ්‍ය සේවාවේ ඉන්න කිසිම කෙනෙක් රෝගියෙකු මියයනවාට කැමැති නැහැ.

එළෙස රෝගීන් මියයාමට අපි ඉඩදෙන්නෙත් නැහැ.

රෝගීන්ට දැන දැන වැරදි බෙහෙත් හොද නැති බෙහෙත් දෙන්න අපි පෙළබෙන්නේ නැහැ.

බාල බෙහෙත් ගේනවා කියලා එකක් අපි කරන්නේ නැහැ.

බාල බෙහෙත් කියලා ජාතියක් අපට ගේන්න බැහැ වගේම ටෙන්ඩර් කරන්නේ නැහැ.

අපි ගෙන්වන්නේ එම රටවල ලියාපදිංචි කළ, ඖෂධ නියාමන අධිකාරියේ ලියාපදිංචි කළ ඖෂධ.

හදිසි මිලදී ගැනීම්වලදීද එම රටවල ලියාපදිංචි කළ ඖෂධයි ගෙන්වන්නේ. අදාළ ඖෂධ ගෙනඒමෙන් පසු ගුණාත්මකභාවය අඩුවීමේ හැකියාවන් පෙන්වනවා.

එය මෙයට පෙර ද අවුරුදු ගණනාවකම සිදු වී තිබෙනවා.

2017 වර්ෂයේ 93 ක්, 2018 වර්ෂයේ 85 ක්, 2019 වර්ෂයේ 96 ක්, 2020 වර්ෂයේ 77 ක්, 2021වර්ෂයේ 85 ක්, 2022 වර්ෂයේ 86 ක්, 2023 මේවන විට 83 ක් ගුණාත්මකභාවයෙන් අඩු ඖෂධ තිබිලා තිබෙනවා.

මෙය මේ වසරේ පමණක් සිදු වූ දෙයක් නොවෙයි.

අපි සෞඛ්‍ය දෙපාර්තමේන්තුව විදිහට බාලබෙහෙත් ගෙන්වා රෝගීන්ට දෙන්නේ නැහැ.

කිසි දිනෙක එසේ ගෙනල්ලත් නැහැ.

සෞඛ්‍ය සේවාවන් ඉදිරියටත් නිසි පරිදි සිදු කරනවා.

කිසිම කෙනෙක් රජයේ රෝහලකට එන්න බියවෙන්න එපා.

නිදහස් සෞඛ්‍ය හා නිදහස් අධ්‍යාපනය අපි රැකගත යුතුයි. ”

“සෞඛ්‍ය ක්ෂේත්‍රයේ ඇතිවන හැම ප්‍රශ්ණයක් පිළිබදවම සෞඛ්‍ය අමාත්‍යතුමා අප සමග දීර්ඝව සාකච්ඡා කරනවා.

අවශ්‍ය සියළු උපදෙස් ලබාදෙනවා.

සාක්ෂි මත පදනම්ව රෝගීන්ගේගේ සුරක්ෂිතතාවය උදෙසා ගත හැකි හැම තීරණයක්ම අපි ගන්නවා. ”

“ආසාත්මිකතාවයක් පැරසිටමෝල් ඖෂධයට වුවත් එන්න පුළුවන්.

අපි ගිය සතියේ පේරාදෙණියේ සිදුවීමෙන් පස්සේ ලංකාවේ සියළුම රෝහල් අධ්‍යක්ෂවරුන්, වෛද්‍ය අධිකාරිවරුන් සහ රෝහල්වල ප්‍රධානීන් සමග මෙවැනි තත්ත්වයකට අපි මුහුණ දෙන ආකාරය පිළිබදව සාකච්ඡාවක් සිදු කළා.

සෞඛ්‍ය දෙපාර්තමේන්තුව ලෙස අපේ එකම අභිප්‍රාය රෝහලක් තුළ දී මෙවැනි අසාත්මිකතාවයන්ට ලක්වන සෑම රෝගියෙකු බේරා ගැනිමයි.

සියළු විශේෂඥ වෛද්‍යවරුන්ගේ සංගම් සෞඛ්‍ය අමාත්‍යාංශය සමග එකතු වී ලබන සතියේ 24 සිට සියළුම රෝහල්වල හදිසි ප්‍රතිකාර පිළිබදව සතිය පුරාම දැනුවත් කිරීමට අවශ්‍ය කටයුතු සාකච්ඡා කර තිබෙනවා.

ග්‍රාමිය රෝහලේ වෛද්‍යවරයා සහ හෙදිය දක්වාම එම වැඩපිළිවෙල දියත් කිරීමට අපි බලාපොරොත්තු වෙනවා. ”

මෙම අවස්ථාවට සෞඛ්‍ය අමාත්‍යාංශයේ අතිරේක ලේකම් වෛද්‍ය සමන් රත්නායක ,නියෝජ්‍ය අධ්‍යක්ෂ ජනරාල් රිඡ්වේ ආර්යා ළමා රෝහලේ අධ්‍යක්ෂ වෛද්‍ය ජී විඡේසූරිය සහ වෛද්‍ය සැපයීම් අංශයේ නියෝජ්‍ය අධ්‍යක්ෂ ජනරාල් වෛද්‍ය ඩී.ආර්.කේ හේරත් යන මහත්වරු ද එක්ව සිටියා.

ITN News Editor
By ITN News Editor ජූලි 21, 2023 10:29

ව්‍යාපාරික පුවත්- තවත් මෙතනින්

ක්‍රීඩා පුවත්- තවත් මෙතනින්

රස බර- තවත් මෙතනින්