fbpx

Life+News The Official News Portal of Independent Television Network Ltd

ව්‍යාජ හෙළ බොජුන් ආහාර අලෙවි ස්ථානවලට රැවටෙන්න එපා

ITN News Editor
By ITN News Editor අප්‍රේල් 28, 2023 16:29

ව්‍යාජ හෙළ බොජුන් ආහාර අලෙවි ස්ථානවලට රැවටෙන්න එපා

හෙළබොජුන් නමින් පවත්වාගෙන යන ව්‍යාජ  අනුකරණ ආහාර අලෙවි ස්ථානවලට රැවටෙන්න එපා.

ඇණවුම් කළ  අවස්ථාවේම සහල් පිටි යොදා සකස් කළ උණුසුම් ආහාර ලබා දෙන්නේ කෘෂිකර්ම අමාත්‍යාංශයේ හෙළබොජුන් අලෙවිසැල්වලින් පමණයි- කෘෂිකර්ම අමාත්‍යාංශය පාරිභෝගිකයින්ගෙන් ඉල්ලීමක් කරයි.

කෘෂිකර්ම අමාත්‍යාංශයේ සංකල්පයක් පරිදි තිරිඟු පිටි වෙනුවට හාල් පිටි යොදා ගනිමින් සකස් කරන ලද ආහාර ප්‍රවර්ධනය සඳහා මේ වනවිට දිවයින පුරා හෙළ බොජුන් නමින් ආහාර අලෙවි සැල් ජාලයක් පවත්වාගෙන යනු ලබයි.

මෙම හෙළබොජුන් ආහාර අලෙවිසැල් කෘෂිකර්ම අමාත්‍යාංශයේ සංකල්පයක් වන අතර එම නමින් වෙනත් පුද්ගලයින් ද ආහාර අලෙවි ස්ථාන පවත්වාගෙන යන බවට තොරතුරු වාර්තා වී තිබේ.

නමුත් හෙළ බොජුන් අලෙවි සැල්වල ආහාර සකස් කරනු ලබන්නේ සියයට සියයක්ම දේශීය ආහාර ද්‍රව්‍ය යොදාගනිමිනි. කෘෂිකර්ම අමාත්‍යාංශයේ හෙළබොජුන් අලෙවිසැල්වල කිසිසේත්ම තිරිඟු පිටි යොදා සකස් කළ ආහාර වර්ග අලෙවි කරන්නේ නැත. තිරිඟු පිටි වෙනුවට සහල් පිටි යොදා ගනිමින් සකස් කළ පෝෂ්‍යදායී ආහාර හා සීනි මිශ්‍ර නොකර සකසන ලද පලතුරු බීම හා බෙලිමල්, හා රණවරා වැනි බීම වර්ග පමණක් අලෙවි කරනු ලබයි.

එමෙන්ම පරණ ආහාර හා උණුසුම් නැති ආහාර ද්‍රව්‍ය අලෙවි කිරීම තහනම් වේ. පාරිභොගිකයින් වෙත එම අවස්ථාවේ ම සකස් කළ උනුසුම් ආහාර ලබා දීමට හෙළ බොජුන් ආහාර මධ්‍යස්ථාන විසින් සිදු කරයි.

හෙළබොජුන් නාමය යොදා ගනිමින් ව්‍යාජ ලෙස පවත්වාගෙන අලෙවි ස්ථාන නිසා පාරිභෝගිකයින් රැවටීමත්, තිරිඟු පිටිවලින් සකසන ලද ආහාරවර්ග හා පරණ ආහාරත් අලෙවි කරනු ලබයි.

මේ නිසා කෘෂිකර්ම අමාත්‍යාංශය විසින් පවත්වාගෙන යනු ලබන හෙළබොජුන් නාමය සහිත ආහාර අලෙවි ස්ථාන හැර එම නාමය භාවිතා කරමින් පවත්වාගෙන අනිකුත් ස්ථාන කිසිසේත්ම රජයට අයත් හෙළබොජුන් අලෙවි ස්ථාන නොවන බව කෘෂිකර්ම අමාත්‍යාංශය අවධාරණය කර සිටී.

ඊයේ  මේ සම්බන්ධව සාකච්ඡාවක් කෘෂිකර්ම අමාත්‍යාංශයේ දී පැවැති අතර එහිදී කෘෂිකර්ම අමාත්‍යාංශයට අයත් හෙළබොජුන් අලෙවිසැල්වල අනන්‍යතාවය හා ප්‍රමිතිය අඛණ්ඩව පවත්වාගෙන යාම සදහා නිරන්තර අධීක්ෂණ කටයුතු මෙහෙයවන්නැයි කෘෂිකර්ම අමාත්‍ය මහින්ද අමරවීර මහතා කෘෂිකර්ම අමාත්‍යාංශයේ නිලධාරින්ට උපදෙස් දුන්නේය.

දැනට දිවයින පුරා ඇති කෘෂිකර්ම අමාත්‍යාංශයට අයත් හෙළබොජුන් අලෙවිසැල්වලින් විශාල පිරිසක් ආහාර පාරිභෝජනය කරති.

නමුත් ඇතැම් ව්‍යාජ ලෙස පවත්වාගෙන යන ව්‍යාජ හෙළබොජුන්සැල් නිසා මෙම ස්ථානවල ද විශ්වාසය බිඳ වැටෙනු ඇතැයි නිලධාරිහු පෙන්වා දෙති.

එමනිසා හෙළබොජුන් නාමය සහිත ස්ථාන අතරින් සහල් පිටි පමණක් යොදා ගනිමින් ආහාර සකස් කරනු ලබන්නේ කෘෂිකර්ම අමාත්‍යාංශයට අයත් හෙළ බොජුන් අලෙවි සැල්වල පමණක් බව සඳහන් කළ අමාත්‍යවරයා මෙම වසරේ දී හෙළ බොජුන් අලෙවි සැල් ප්‍රවර්ධනය සඳහා රජය විසින් රුපියල් මිලියන 100ක මුදලක් වෙන් කර ඇති බැවින් එම මුදල් යොදා ගනිමින් මෙම අලෙවිසැල් ජාලයේ ප්‍රමිතිය රැක ගැනීම සඳහා සුදුසු වැඩ පිළිවෙළ සකසන්නැයි ද උපදෙස් දුන්නේය.

ITN News Editor
By ITN News Editor අප්‍රේල් 28, 2023 16:29

ව්‍යාපාරික පුවත්- තවත් මෙතනින්

ක්‍රීඩා පුවත්- තවත් මෙතනින්

රස බර- තවත් මෙතනින්