මෙරට ප්රධානතම දේශපාලන පක්ෂයක් වන ශ්රී ලංකා නිදහස් පක්ෂයට අදට වසර 71ක් සපිරෙනවා. ‘‘අපේකමට පණ දෙමු. අභියෝගය අතට ගමු. යුග මෙහෙවරට උරදෙමු.‘‘ මැයෙන් සංවත්සර උත්සවය අද පස්වරුවේ උත්කර්ෂවත්ව පැවැත්වීමට සියලු කටයුතු සූදානම් කර තිබෙනවා.
ශ්රී ලංකා නිදහස් පක්ෂය බිහි කිරීමේ පුරෝගාමියා වන්නේ එස් ඩබ්ලිව් ආර් ඩී බණ්ඩාරනායක මහතායි. 1947දී පිහිට වූ එක්සත් ජාතික පක්ෂ ආණ්ඩුවේ පළාත් පාලන හා සෞඛ්ය අමාත්ය ධුරය දැරුවේ එස් ඩබ්ලිව් ආර් ඩී බණ්ඩාරනායක මහතායි. බණ්ඩාරනායක මහතා ඉන් ඉවත්ව විපක්ෂයට ගොස් 1951 සැප්තැම්බර් දෙවනදා ශ්රී ලංකා නිදහස් පක්ෂය බිහි කළා. සඟ , වෙද , ගුරු , ගොවි, කම්කරු පංච මහා බලවේගය සමග රට භාරගත් එස් ඩබ්ලිව් ආර් ඩී බණ්ඩාරනායක මහතා 1956 දි ශ්රී ලංකා නිදහස් පක්ෂය ප්රමුඛ මහජන එක්සත් පෙරමුණ සමඟ පුළුල් සන්ධානයක් ඇති කර ගත්තා. 1956 පැවති මහ මැතිවරණයේදී විශිෂ්ඨ ජයක් ලබමින් බණ්ඩාරනායක මහතා අග්රාමාත්ය ධූරයට පත්වුණා. පසුව මේ රටට ඉමහත් සේවයක් කළ බණ්ඩාරනායක මහතා 1959 දී සාහසිකයෙකුගේ වෙඩි පහරින් ඝාතනයට ලක්වුණා. ඉන්පසු පක්ෂ නායකත්වය හිමි වූයේ සිරිමාවෝ බණ්ඩාරනායක මැතිනියටයි. නොබැදි පිළිවෙත හා නිෂ්පාදන ආර්ථික ක්රමය පදනම කරගත් බණ්ඩාරනායක මැතිණිය සිය පාලන කාලය තුළ ලංකා ගමනාගමන මණ්ඩලය පිහිටුවීම , මහජන බැංකුව , ලංකා බැංකුව ආරම්භ කිරීම සේම රක්ෂණ සංස්ථාව ජනසතු කිරීම වැනි ජනතා සේවාවන් රැසක් සිදුකළා. ජනරජ ව්යවස්ථාව මගින් ශ්රී ලංකාව ස්වෛරී රාජ්යයක් බවට පත් කිරීමේ ගෞරවය ද හිමිවන්නේ ශ්රී ලංකා නිදහස් පක්ෂයටයි. චන්ද්රිකා බණ්ඩාරනායක කුමාරණතුංග මහත්මිය පක්ෂයේ නායකත්වය භාර ගැනීමෙන් පසු කුඩා පක්ෂ ගණනාවක් එක්කර ගනිමින් පොදුජන එක්සත් පෙරමුණ බිහි කළා. අනතුරුව පක්ෂයේ සභාපතිත්වය හිමිවුණේ මහින්ද රාජපක්ෂ මහතාටයි. පසුව එහි නායකත්වයට පත්වන්නේ මෛත්රීපාල සිරිසේන මහතායි. මෙම සියලු නායකයින් ජනපතිවරුන් ලෙස රටට නායකත්වය ලබා දීම විශේෂත්වයක්. ශ්රී ලංකා නිදහස් පක්ෂයේ 71 වන සංවත්සරය වෙනුවෙන් වැඩසටහන් රැසක් සංවිධාන කර ඇති බවයි එම පක්ෂය සඳහන් කරන්නේ.
ශ්රී ලංකා නිදහස් පක්ෂයේ 71 වන සංවත්සරය වෙනුවෙන් ප්රධාන උත්සවය පැවැත්වුණේ මහරගම ජාතික තරුණ මධ්යස්ථානයේදීයි. ඒ පක්ෂයේ සභාපති හිටපු ජනාධිපති මෛත්රිපාල සිරිසේන මහතාගේ ප්රධානත්වයෙන්. ශ්රී ලංකා නිදහස් පක්ෂයේ ව්යවස්ථාව සංශෝධනය කිරීම සඳහා ඉදිරිපත් කළ යෝජනාවලියට එහිදී එම පක්ෂයේ සමස්ත ලංකා කාරක සභාවේ අනුමැතිය හිමිවුණා. පක්ෂයේ මහලේකම් පාර්ලිමේන්තු මන්ත්රී දයාසිරි ජයසේකර මහතායි එම යෝජනාව ඉදිරිපත් කළේ. මෛත්රිපාල සිරිසේන මහතා ඒ පිළිබඳ ඡන්ද විමසීම සිදුකළා. එහිදීයි සමස්ථ ලංකා කාරක සභා සාමාජිකයන් අත් ඔසවා ඊට එකඟතාව පළකළේ. කෙසේ වෙතත් දැනට අමාත්යධුර දරන නිමල් සිරිපාල ද සිල්වා සහ මහින්ද අමරවීර යන මහත්වරුන් ඇතුළු කිහිප දෙනෙකු එලෙස කැමැත්ත පළකරනු දක්නට ලැබුණේ නැහැ. ඔවුන් අත් ඔසවා අකමැත්ත පළ කිරීමට ද කටයුතු කළේ නැහැ.
