fbpx

Life+News The Official News Portal of Independent Television Network Ltd

යාං ජලාශ ව්‍යාපෘතියේ ඉදිකිරීම් අවසන් අදියරට

ITN News Editor
By ITN News Editor අගෝස්තු 8, 2018 09:54

යාං ජලාශ ව්‍යාපෘතියේ ඉදිකිරීම් අවසන් අදියරට

චීන රජයේ සහයෙන් ඉදිවන යාං ඔය ජලාශයේ ඉදිකිරීම් අවසන් වෙමින් පවතින බව අනුරාධපුර දිස්ත්‍රික් ලේකම් ආර්.එම්. වන්නිනායක මහතා පැවසී ය.

මේ වන විට ප්‍රධාන ඇල මාර්ග සකස් කිරීම සිදුවේ. නැවත පදිංචි කිරීම සදහා වන කාර්යයන් ද කාර්යක්ෂමව සිදුවෙමින් තිබේ. ව්‍යාපෘතිය සදහා වැය කෙරෙන මුදල ඩොලර් මිලියන 150කි. ශ්‍රී ලංකාවේ ඊසාන දිග ප්‍රදේශයේ ජල අවශ්‍යතාව සපුරාලීම සදහා අනුරාධපුර හා ත්‍රිකුණාමල දිස්ත්‍රික් කෙන්ද්‍ර කරගෙන මෙම ජලාශය ඉදිවේ.

ශ්‍රී ලංකාවේ පස්වන දිගම ගංගාව වන යාං ඔය සීගිරිය ප්‍රදේශයෙන් ආරම්භ වී හුරුළු වැව හරහා කිලෝ මිටර 90 පැමිණි තැන , වාහල්කඩ ප්‍රදේශයෙන් හරස් කර මෙම ජලාශය ඉදිකරයි. ඊට වර්ග කිලොමිටර 1500 ක ජල පෝෂක ප්‍රදේශයක් අයත් වේ. ඉදි කළ පසු ජල ධාරිතාව ඝන මීටර් මිලියන 169 කි.

වම් ඉවුර හා දකුණු ඉවුර ඇල වශයෙන් ඇල මාර්ග දෙකක් හරහා ජලය බෙදා හැරීමට සැලසුම් කර ඇත. එයින් හෙක්ටයාර 6000 ක වගා බිම් වලට ජලය සැපයේ. සෙත සැලසෙන පවුල් සංඛ්‍යාව 14000 කි.

මීට අමතරව සෘජු හා වක්‍ර රැකියා අවස්ථා 2000 ක් පමණ මෙම ජලාශ ව්‍යාපෘතිය යටතේ ලබාදීමට නියමිතයි. මෙට්‍රික් ටොන් 12000 ක වාර්ෂික මිරිදිය මත්‍ස්‍ය අස්වැන්නක් ද බලාපොරොත්තු වේ. පානීය ජල අවශ්‍යතාවට ද මෙම ජලාශයෙන් සපුරාගත හැකිය.

වාර්මාර්ග අමාත්‍යංශය හා වාරිමාර්ග දෙපාර්තමේන්තුව මෙහි සේවා යෝජකත්වය දරයි. චයිනා සී.ඒ.එම් .සී. ඉංජිනේරු සමාගම මගින් ඉදිකිරීම් කටයුතු සිදුකෙරේ.

ITN News Editor
By ITN News Editor අගෝස්තු 8, 2018 09:54

ව්‍යාපාරික පුවත්- තවත් මෙතනින්

ක්‍රීඩා පුවත්- තවත් මෙතනින්

රස බර- තවත් මෙතනින්