Life+News The Official News Portal of Independent Television Network Ltd

රස කියා දිනපතාම වස කන අපි…

ITN News Editor
By ITN News Editor නොවැම්බර් 4, 2018 14:02

රස කියා දිනපතාම වස කන අපි…

ජාතියක්‌ ලෙස අපි කලක සිට සිහිනයකින් හෝ නොසිතූ ඛේදවාචකයකට මුහුණ දෙමින් සිටින්නෙමු. බල්ලො මරා හෝ සල්ලි සොයා ගෙන ජොලි කරන්නට ඉඩ ප්‍රස්‌ථාව ඇති සමාජයක මෙවන් ඛේදවාචක ඇතිවීම පුදුමයක්‌ නොවේ. යලට මහට සරු අස්‌වැන්නක්‌ ගෙන, බඩ කට පුරා හොඳ රහට කාපු ජාතියක්‌ වූ අපට අද කන්නට සිදුවී ඇත්තේ වස විසය. තත්ත්වයෙන් ගුණයෙන් හා රසයෙන් බාල කළ කුණු ගොඩවල්ය. මේ රටේ ජනතාව කන බොන දේ වටා අද විපත් රැසක්‌ ගොනුකර ඇත. මෙරට ප්‍රධාන සෞඛ්‍ය නිලධාරීවරුක්ද හෙළි කරන්නේ අපේ අයියලාගේ යටිකූට්‌ටු මගෝඩියකි. එනම් තරු හෝටල් ඇතුළු වෙනත් ආපන ශාලාවලින් භාවිත කර ඉවත් කරන තෙල් පිරිසිදු කර නැවත වෙළෙඳපොළට නිකුත් කරන ජාවාරමක තොරතුරුය.

රටේ යටිකූට්‌ටු වැඩ පුරයේ ආහාර පාන බාල කිරීම සම්බන්ධයෙන් ඇති කතාව අසන්නට බලන්නට තරම් වටිනා මහා ඛේදවාචකයකි. පලතුරුවලින් කිහිපයක්‌ හැර අනෙක්‌වා සියල්ල කාබයිට්‌ ගසා ඉදවූ පලතුරු ය. විශේෂයෙන් ආනයනය කළ පලතුරු කල්තබා ගැනීම වෙනුවෙන් බෙහෙත් එන්නත් කළ ඒවා ය. තාත්තා උදේ බෙහෙත් ගැසූ පේර කා දුව මියගිය හද කම්පා කළ සිද්ධිය අපේ රටේ බෙහෙත් කෙරුවාවේ තරම රටට කියාපාන්නකි. විශේෂයෙන් අද පදික වේදිකා දෙපස ඇති පැණි කොමඩු ආදියට කපටිව වර්ණක එන්නත් කර තද රතු පාටින් ඉදී ඇති බවට ඔප්පු කිරීමට උත්සාහ කරන පිරිස්‌ ඇත. බොහෝමයක්‌ පලතුරුවල එහි නටුව පරීක්‍ෂා කිරීමෙන් ඒවා ඉදී ඇති නැති බව, ඒවා නෙළාගත් දිනය ආදිය හඳුනාගත හැකිමුත් අද වෙළෙඳපොළේ ඇති පලතුරු බොහෝමයක නටුව කපා දැමීමට කූට වෙළෙඳුන් ක්‍රියා කරයි.

පලතුරු වෙළෙඳසල්වල ඉතා සුගන්ධයෙන් යුතු හඳුන්කූරු ආදිය එයාර් ෆෙෂ්නර් ආදියෙන් සුවඳකොට ඇති බව ඔබ දැක ඇතුවාට සැකයක්‌ නැත. ඔවුන් එය කරන්නේ පලතුරුවල ස්‌වභාවික සුවඳ පාරිභෝගිකයාට දැනීම වැළැක්‌වීමටය. දිවුල් ඉදවන්නට බෙහෙත් ගහන්නේ නැතිමුත් ඒවා මඩේ ගසා, ඉදීම ඉක්‌මන් කරන පිරිස්‌ද සිටියි. අලි ඇත්තු දිවුල් කෑ විට එහි කට්‌ට පොඩි නොවේ. ආහාර ජීර්ණයෙන් පසු කට්‌ට හැර අනෙක්‌ සියලු දේ අසුචි ලෙස පිටවේ. මෙලෙසින් පිටවූ දිවුල් ගෙඩියක්‌ පිටින් දැක්‌ක විට හොඳ ගෙඩියකින් වෙන්කර හඳුනාගත නොහැකිය. පොළේ දී හෝ වෙනත් තැනකදී කලබලයෙන් ඔබේ මල්ලට වෙළෙන්දා එබූ දිවුල් ගෙඩි අතර මද නැති දිවුල් හම්බ වුණොත් එය අලියා ගිල්ල දිවුල් ගෙඩියක්‌ බව ඔබ හඳුනා ගන්න. ගල්සියඹලා, වෙරළු, නෙල්ලි, මාදං වැනි පලතුරු ලෙස අපේ මෝඩයන් පිළිගැනීමට අකැමැති පලතුරු කිහිපයක්‌ම හැර අනෙකුත් සියලුම පලතුරුවලට කාබයිට්‌ විදියි. ආඩම්බරෙන් ගිහින් ගහේ හිටියටත් වඩා කාලයක්‌ නැවේ හිටිය ඇපල් ගන්නවාද… නැතිනම් කඩා වැඩිම වුණොත් දින හතරක්‌ කල්ගත වූ දං ගෙඩියක්‌ ගන්නවාද යන තීරණය ඔබ සතුය.

රට වගේ තුන් ගුණයක මුහුදක්‌ අයිති, උදේකට නිස්‌කලංකේ උසක සිට ඈත මෑත බැලූ විට රටේ මධ්‍යම කඳුකරය පේන පුංචි රටක සිටින අපට පාලකයන් ශක්තිමත්ව සිටීනම් තුන්වේලටම මාළු කන්නට හැකිය. ඇත්තෙන්ම නිසි වැඩපිළිවෙළක්‌ තිබුණේ නම් ලෝකයටම මාළු දෙන්නට තරම් විශාල මත්ස්‍ය සම්පතක්‌ අපේ රටේ තිබේ… එදා දුප්පතාගේ නිත්‍ය ආහාරවේල වූ කරවලවල අද මිනී එම්බාම් කරන්නට ගන්නා ෆොමලින් යහමින් අඩංගුය. ඒ මදිවට බැටරි ඇසිඩ්ය. පරණ මාළුන්ගෙ කරමල්වලට අලුත් මාළු ලේ දමා රතු පාට කරයි. විවිධ රසායනික ද්‍රව්‍ය යොදා පරණ මාළුන්ගේ ශරීරයට දිප්තියක්‌ ගෙන දෙයි. උම්බලකඩ කුඩු ලෙස පැකට්‌ කරන උම්බල කුඩුවලට අමතරව කුණු රොඩු ද ඇතුළත්ය.

රටේ භාවිත කරන කුළුබඩු ආදිය ද තත්ත්වයෙන් බාල කළ ඒවාය. මිරිස්‌ කුඩුවලට ගඩොල් කුඩු එකතු කර ඇතැයි සමාජයේ ඇති කතාව හුදෙක්‌ හිතළුවක්‌ පමණක්‌ම නොවේ. ලංකා මිරිස්‌ සැරෙන් ඉතා ඉහළ වුවත් වර්ණය තද රතු පැහැයක්‌ නොගනියි. ඉන්දියන් මිරිස්‌ මෙහි අනෙක්‌ පැත්තයි. සිල්ලර කඩේකින් ඔබ කිරා මිලදී ගන්නා මිරිස්‌ ග්‍රෑම් 100 න් ග්‍රෑම් කොච්චරක්‌ ඉන්දියන් මිරිස්‌ද, ලංකා මිරිස්‌ද එහෙමත් නැතිනම් ගඩොල් කුඩුද යන්න පැවසීමට ශක්‍රයාගේ පුතා වෛමාටවත් බැරිය. කුළුබඩු කෙරුවාව එතැනින් අවසාන වන්නේ නැත. කුළුබඩු බොහොමයක්‌ වර්ණ කාරක, රස කාරක දැමූ ඒවාය. ගෙදරදී සාදා කුඩු කරගත් කහ හැඳි තුන හතරකින් ගන්නට බැරි පාට කඩෙන් ගත් එක කහ හැන්දෙන් ලැබෙන්නේ ඒ නිසාය. වාණිජ අරමුණු මුල්කොට ගෙන නිෂ්පාදනය කරන බොහොමයක්‌ කුළුබඩුවල තත්ත්වය මෙසේය. විශේෂයෙන් කරදමුංගූ, කරාබුනැටි ආදියේ පෝෂණ කොටස්‌ උකහාගෙන වෙළෙඳපොළේ ඇති බොහෝමයක්‌ කුළුබඩු ඇත්තෙන්ම රොඩුය.

ඔබ ජීවිතේ කොපමණ වාරයක්‌ සුදුපාට හුරු කරදමුංගු දැක ඇතිද? නියම කරදමුංගු ඇත්තෙන්ම කොළ පාටය. සිංහල බෙහෙත්වල කතාවද මෙසේය. සිංහල බෙහෙත් බඩු කඩෙන් ඔබ මිලදී ගන්නා බෙහෙත් බොහොමයක පෝෂණ කොටස්‌ ලබාගත් ඒවා වන අතර තවත් ඒවා කුණුරොඩු බව ඔබ විශ්වාස කරනවාද? අපේ රටේ ආහාර කලාවේ රස රහස කරපිංචා යැයි කිව්වොත් එය අතිශයෝක්‌තියක්‌ නොවේ. කරපිංචා යනු මාහැඟි රස කාරකයි. එහි අද්විතීය රසය අන් සියල්ල පරදවයි. ඒත් අවාසනාවට අද ඔබ අතට පත්වන්නේ ගම් කරපිංචා නොව කැලෑ කරපිංචාය. කැලෑ කරපිංචා හා ගම් කරපිංචා යෑයි වර්ග දෙකක්‌ නැතිමුත් කැලෑ ආශ්‍රිතව කප්පාදුවකින් තොරව මිනිස්‌ ආශ්‍රයෙන් තොරව හැදෙන ගස්‌ කරපිංචා රස නැත. කැලෑ කරපිංචා හඳුනා ගැනීම පහසු අතර එහි කොළ විශාලය. කළු පාටට හුරු කොළ පැහැයක්‌ ඇති මේ කොළ ගම් කරපිංචා තරම් සුවඳ නැත.

ලංකාවේ එළවළුවලට වන සන්තෑසිය මේ ලොව වෙන කිසිදු රටක සිදු නොවන බවට සැකයක්‌ නැත. අපේ එළවළු ඉපදෙන්නටත් පෙර රසායනික ද්‍රව්‍යවලට නිරාවරණය වේ. පොළොව යට හැදුණද, පොළොව උඩ හැදුණද මැස්‌සක හැදුණද එහි ඇති වෙනසක්‌ නැත. වෙනකක්‌ තබා තුඹ කරවිල, තිබ්බටුවලට පවා බෙහෙත් ගසයි.

අපේ රටේ බොහොමයක්‌ භෝජනාගාරවල ඇත්තේ ඒවා හැදූ දවස පුරාවිද්‍යාඥයන්ටත් තීරණය කරන්නට බැරි කෑම බව ප්‍රසිද්ධ රහසකි. මස්‌ මාළු ආදිය බදින්නට පෙර තෙල් තාච්චියට ප්ලාස්‌ටික්‌ බෝතල් දමන්නේ කෑම හුළංගැසී හං වීම වළක්‌වා ගන්නටය. තෙල් තාච්චියට තවත් බොහෝ දේ මිශ්‍ර කර එළවළු කරිවලට දමන්නේ එළවළු පිළුණු වීම වළක්‌වා ගැනීමටය. බොහෝමයක්‌ භෝජනාගාරවලට ගේන හාල් කොළ තැම්බුණු ඒවාය. (එනම් ගොයම් කපා ගොඩගසා තිබූ විට වැස්‌සට අසුවූ ඒවාය) එළවළු පලතුරු ආදිය සියල්ලම නරක්‌ වූ ඒවායින් කපාගත් ඒවා වන අතර පලතුරු ජූස්‌ ගැන නම් කතා කර වැඩක්‌ නැත. පාර දෙපැත්තේ තැන තැන තබා ඇති නැවුම් දොඩම් බොමු කීවාට ඔවුන් ඔබට පොවන්නේ ජලයට දෙහි මිශ්‍ර කර හදාගත් බීමය.

පුරා සියවසක්‌ දහඩිය කඳුළු මතින් ගොඩනඟා ගත් “සිලෝන් ටී” නැතිනම් ලොව හොඳම තේ නාමයද අපේ රටින් බිඳ වැටුණේ මේ ආහාර බාල කිරීමේ ජාවාරම නිසා බවද අපි මෙහිලා අමතක නොකළ යුතුය. තේ වගාකරුවන් ඔළුවෙන් හිටගෙන කීවද විස රසායනික ද්‍රව්‍ය ඔවුන්ට අවශ්‍ය වන්නේ අනෙකක්‌ නිසා නොව එමගින් නිසා ඔවුන්ට වල් නෙළන කම්කරුවන්ට මුදල් ගෙවීමට සිදු නොවන නිසාය. ඒත් එයින් සිදුවන පාරිසරික අර්බුද තබා සිය කර්මාන්තයේ සිදුවන කඩාවැටීම ගැනවත් ඔවුන්ට ගාණක්‌ නැත. රසායනික ද්‍රව්‍ය භාවිතය හේතුවෙන් තේවල තත්ත්වය ද පහත වැටෙන බවත්, එයින් ලොව ඇති තේ ඉල්ලුම පහත වැටෙන බවත්, ඔවුන් හිතන්නේ නැතිවීම එක්‌ අතකට විමතියට කරුණකි.

ඇත්ත ඇති සැටියෙන්ම කිවුවොත් අපි දහදිය මහන්සියෙන් උපයා ගන්නා බත් පතේ සිට කන්නට ගන්නා පලතුරු ගෙඩියේ සිට බොන වතුර ටික පමණක්‌ නොව උණට හෙම්බිරිස්‌සාවට බොන ඉඟුරු කොත්තමල්ලිවලට පවා අද වස විස මිශ්‍රකර ඇත. ඒවායේ ගුණාත්මක බව අඩුකර ඇත. පැල ඉණි වැටට හිටවූ දණ්‌ඩක්‌ දලුලා වැඩෙන රටක්‌ රසායනික පොහොරින් පිරවූවෝ කවරහුද? තමා බඩගින්නේ සිටියදී ගෙදරට ආ අසරණයාට බත්පත දී වතුර දෝතකින් බඩ සනසාගත් මිනිසුන් අනෙකාගේ බත් පතට පමණක්‌ නොව ලෙඩට, බොන බෙහෙත් විඩට පවා වස විස යොදන හොර බොරු කරන තත්ත්වයට ඇද දැමුවෝ කවරහුද? අද මේ රටේ වන අහස පොළව නුහුලන අපරාධවලට වගකිව යුත්තෝ කවරහුද? ඒ ගැනත් සිතන්න.

 

-ශානිකා රත්නායක-

 

ITN News Editor
By ITN News Editor නොවැම්බර් 4, 2018 14:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*

ව්‍යාපාරික පුවත්- තවත් මෙතනින්

ක්‍රීඩා පුවත්- තවත් මෙතනින්

රස බර- තවත් මෙතනින්